Thaçi thotë se Maqedonia zgjodhi rrugën e integrimeve evropiane

  • October 20, 2018 08:00
  • Auto

Kuvendi i Maqedonisë mbrëmë miratoi nismën për ndryshimet kushtetuese, që i hap rrugë Marrëveshjes së Prespës për emrin e ri të këtij shteti. Këtë vendim Presidenti i Kosovës, Hashim Thaçi e vlerëson si hap drejt rrugës evropiane të Shkupit.

Thaçi, përmes një postimi në Facebook, tha se “Kuvendi i Maqedonisë mbrëmë dha shembullin e bashkimit të të gjitha partive për të mirën e qytetarëve dhe shtetit të tyre”.

Postimi i plotë i Thaçit:

“Maqedonia e zgjodhi rrugën e integrimeve euroatlantike dhe bëri një hap të madh për forcimin e paqes në tërë rajonin tonë. Kuvendi i Maqedonisë mbrëmë dha shembullin e bashkimit të të gjitha partive për të mirën e qytetarëve dhe shtetit të tyre. Shteti forcohet dhe integrohet kur të zgjedhurit e popullit marrin vendimet e duhura dhe tejkalojnë interesat politike për interesat shtetërore. Republika e Kosovës i gëzohet këtij vendimi shumë të rëndësishëm të shtetit tonë fqinj. Paqen dhe stabilitetin në rajon e forcojmë vetëm duke dëshmuar vendosmëri në orientimin euroatlantik dhe duke punuar shumë për integrimin në familjen evropiane”, ka shkruar Thaçi.

Pas afër tri dekadash Maqedonia dhe Greqia kanë arritur marrëveshje, sipas së cilës emri i ri është Maqedonia e Veriut. /Telegrafi/

Loading...